ეს ემსახურება სახელმწიფოს ინტერესებს , - ასე უპასუხა სახელმწიფო უსაფრთხოების სამსახურის ხელმძღვანელმა გრიგოლ ლილუაშვილმა ჟურნალისტების კითხვას ტოტალურ მოსმენებთან დაკავშირებით. სოხუმის დაცემის დღეს ომში დაღუპულ გმირთა მემორიალთან ლილუაშვილს ჟურნალისტებმა ჰკითხეს, რატომ უსმენს მათ მისი სამსახური და თუკი მოსმენები კანონიერად ხორციელდება, პროკურატურა რატომ ანიჭებს "კრებსებში" მოხვედრილ ჟურნალისტებს დაზარალებულის სტატუსს.

"ვინმემ გამოიყენა თქვენს წინააღმდეგ? დაგაშანტაჟათ თუ რა? რომელი კრებსები იყო? აუდიო? ვიდეო? სპექტაკლი რომ დადგით, აგენტი 001 და აგენტი 007? ამ სისულელეებს? გამოძიებამ თქვენ მოგწერათ, გადმოგვეცით ის მასალები, რაც გაქვთო და გადაეცით მასალა, თუკი გინდათ გარკვევა. ოღონდ მერე არ აღმოჩნდეს, რომ ამის შემოქმედი არა სუსი, არამედ თქვენი ტელეკომპანიაა", - განაცხადა გრიგოლ ლილუაშვილმა .

პროკურატურამ 2022 წელს ათობით ჟურნალისტს, მათ შორის რადიო თავისუფლების ჟურნალისტებს მიანიჭა დაზარალებულის სტატუსი - მიზეზი სხვადასხვა დროს, სავარაუდოდ, სუსიდან გამოჟონილ ფაილებში მათი კომუნიკაციის ამსახველი ჩანაწერებია, რომლებიც უკანონო მოსმენისა და მიყურადების შედეგად არის მოპოვებული და რომლის ავთენტურობასაც ყველა ჟურნალისტი ადასტურებს.

მოსმენების საქმეზე სარჩელები საქართველოდან გაგზავნილია ევროპის ადამიანის უფლებათა სასამართლოშიც.