მანვე განმარტა, რომ ოპოზიციაში განხეთქილებაზე ელენე ხოშტარიას მიერ დაწყებული შიმშილობაც მიუთითებს.

„ელენე ხოშტარიას ჯანმრთელობა ვუსურვებ, აღნიშნული გადაწყვეტილება კი მიუთითებს, რა მდგომარეობაა ოპოზიციაში. მესმის, რომ თავიანთი პატრონები გარედან ცდილობენ მათ ერთ პლატფორმაზე თავმოყრას, ამის არაერთი მცდელობა იყო. რამდენიმე პოლიტიკურმა ჯგუფმა გადაწყვიტა არჩევნებში მონაწილეობის მიღება, მესმის მათიც – თუ პოლიტიკურ პროცესებში არ მიიღებ მონაწილეობას, რადარებიდან გაქრები და ხალხის მცირე მხარდაჭერაც არ გექნება. შესაბამისად, ვხედავთ განხეთქილებას, თუმცა დეტალებში არ მინდა შევიდე. ჩვენ მზადება დაწყებული გვაქვს მომდევნო არჩევნებისთვის, არსებობს გამოწვევები, რასაც ღირსეული პასუხის გაცემა სჭირდება“, – განაცხადა კახა კალაძემ.

თბილისის მერის თქმით, ოპოზიციის წარმომადგენლები საგამოძიებო კომისიაზე განგებ არ ცხადდებიან და ამ გზით პოლიტიკური სარგებლის მიღებას ცდილობენ.

„საგამოძიებო კომისიაზე არ გამოცხადებაც მათი მხრიდან წინასწარ გადადგმული ნაბიჯებია. კარგად იციან, თუ არ გამოცხადდებიან ამას მოჰყვება შესაბამისი რეაგირება, იციან, რომ დიდი სასჯელიც არ არის და ამით უნდათ პოლიტიკური „ბენეფიტების“ მიღება. ისმის მეორე კითხვა – მართალი ადამიანი თუ ხარ, რა პრობლემაა მისვლა და პასუხების გაცემა“, – აღნიშნა კახა კალაძემ.