მისივე თქმით, თვითმმართველობის არჩევნებს, ადგილობრივების გარდა, სხვადასხვა ქვეყნის წარმომადგენლებიც დააკვირდებიან, რაც შეეხება ეუთო/ოდირს, ისინი ადგილობრივ არჩევნებში აქტიურად არ ერთვებიან.

„დამკვირვებლებზე, რა თქმა უნდა, არ ვამბობთ უარს და უამრავი საერთაშორისო დამკვირვებელი ეყოლება ამ არჩევნებს, ამაში დარწმუნებული ვარ. არა მარტო საერთაშორისო, არამედ ქვეყნის შიგნით მყოფი დამკვირვებლებიც იქნებიან.

ოპოზიციის კრიტიკა შეიძლება ასე იყოს წარმოდგენილი, თითქოს, დამკვირვებლები არ იქნებიან ამ არჩევნებში. ეს, რა თქმა უნდა, დეზინფორმაციაა. დამკვირვებლები იქნებიან, სხვადასხვა სახელმწიფოს წარმომადგენლები, სახელმწიფოთაშორისი ორგანიზაციები, ცენტრალური საარჩევნო კომისიის წარმომადგენლები და ა.შ.

თუ საუბარია იმაზე, რომ მაინცდამაინც ეუთო/ოდირის წარმომადგენლობა რატომ არ იქნება – მივყვებით იმ პრაქტიკას, რომელიც არსებობს მსოფლიოში.

როდესაც საპარლამენტო არჩევნები ტარდება და როდესაც საპრეზიდენტო არჩევნები გვქონდა ეუთო/ოდირი ყოველთვის მონაწილეობდა და ამას უზრუნველვყოფდით, მაგრამ ზოგადი პრაქტიკა არის, რომ ეუთო/ ოდირი, როგორც წესი, თვითმმართველობის არჩევნებში აქტიურად არ ერთვება. ეს არ არის მათი პრიორიტეტული არჩევნები.

1995- წლიდან 2024 წლის ჩათვლით 286 შემთხვევა არის, როდესაც ეუთო/ოდირი საპარლამენტო არჩევნებს აკვირდებოდა და მხოლოდ 38 შემთხვევა არის, როდესაც თვითმმართველობის არჩევნებში მონაწილეობდა. თავისთავად, ეს ციფრები მიუთითებს იმაზე, რომ ეს არ არის პრიორიტეტული არჩევნები ეუთო/ოდირისთვის“, – განაცხადა გიორგი კახიანმა.