კუჭავას თქმით, ამასთან დაკავშირებით საუბარი ჰქონდა როგორც ევროპარლამენტის პრეზიდენტთან, ასევე ევროპარლამენტარებთან, რომლებიც, ასევე, ჩართული იქნებიან ჟან მონეს დიალოგში.

"ამ დიალოგის პროცესშიც ვაპირებთ, როგორც ეს გაწერილია შეთანხმებით, ერთწლიან ვადაში დავასრულოთ მთლიანად მართლმსაჯულების რეფორმა, რომელიც მოიაზრებს მესამე და მეოთხე ტალღის ანალიზს, შესაბამის რეკომენდაციებსა და იმ რეფორმების გატარებას, რაც დამატებით იქნება საჭირო. ამიტომ, უარს არათუ არ ვამბობთ, არამედ ამას აუცილებლად ჩავატარებთ და ნახავს ყველა. ეს არ არის დაკავშირებული არანაირ მიკროსაფინანსო სესხთან.

შარლ მიშელის დოკუმენტის ხელმოწერამდე იყო საუბარი ამ სესხზე. ამიტომ, ამის ერთმანეთთან მიბმა უბრალოდ არ არის სწორი და მართლა შეცდომაში შეყვანაა. ჩვენ რას გავაკეთებთ და რა რეფორმებს ჩავატარებთ, ამას ყველა ძალიან კარგად ნახავს და ისე გაგრძელდება, როგორც არის დაგეგმილი - ზუსტად არჩევნების შემდეგ. ამის შესაბამისი ფორმატიც მოფიქრებულია და პროცესებიც დაიწყება. იმედი მაქვს, ყველა პოლიტიკური ჯგუფი თუ ძალა მონაწილეობას მიიღებს ამ პროცესში, რომელიც პარლამენტში გაიმართება და ჩართული იქნებიან, მათ შორის, ევროპარლამენტის წარმომადგენლები", - აღნიშნა კახა კუჭავამ.