“რუსეთ-საქართველოს შორის ავიამომისვლის შესაძლო აღდგენის შესახებ კრემლის მიერ გაკეთებულმა განცხადებამ რამდენიმე მოსაზრება გააჩინა; კერძოდ, ეს შესაძლოა ერთგვარ აღიარებად ჩაითვალოს, რომ მოსკოვმა ამ აკრძალვით საქართველოს ის ეკონომიკური ზიანი ვერ მიაყენა, რასაც რუსული მხარე მოელოდა. თანაც, რუსეთის ეკონომიკაც გარკვეული წნეხის ქვეშ ექცევა, რაზეც თავად მოსკოვი აუცილებლად უნდა დაფიქრდეს და ფრენა აღადგინოს. რეალურად უნდა ითქვას ისიც, რომ ავიამომისვლის აღდგენა რუსეთის ინტერესშიცაა. რუსეთის პრეზიდენტის პრესმდივანმა, დიმიტრი პესკოვმა რამდენიმე დღის წინ განაცხადა, რომ რუსეთმა და საქართველომ უნდა დააფიქსირონ ის მომენტი, რომელიც ავიამიმოსვლის აღდგენისთვის შესაფერისი იქნება. ამის შესახებ ინფორმაციას რუსული მედია ავრცელებს”, - წერს გაზეთი "რეზონანსი“ სტატიაში სათაურით, როდისაა მოსალოდნელი ავიარეისების აღდგენა რუსეთთან და რატომ ალაპარაკდა მოსკოვი ფრენების განახლებაზე / “რაიმე კატასტროფის მოწყობა საქართველოს ტურისტულ სექტორში რუსეთის ხელმძღვანელობამ ვერ შეძლო“
“ბოლო წლებში მსოფლიო პოლიტიკური წესრიგი რადიკალურად შეიცვალა, თუკი მანამდე სუპერსახელმწიფოდ მხოლოდ აშშ მოიაზრებოდა, ახლა გეოსტრატეგიული პოზიციები სამ წამყვან ძალაზე გადანაწილდა. მსოფლიო წესრიგში მეორე მთავარი ქვეყანა ჩინეთია, რომელიც ბირთვული-სტრატეგიული იარაღით და სოციალურ-გეოპოლიტიკური კონცეფციით ერთ-ერთ მთავარ მოთამაშედ იქცა, რუსეთმა კი ამ სამეულში სამხედრო პოტენციალით და გეოპოლიტიკური ამბიციებით დაიმკვიდრა თავი. ექსპერტი უსაფრთხოების საკითხებში ვახტანგ მაისაია „რეზონანსთან" ამბობს, რომ სამპოლუსიანი გეოპოლიტიკური წესრიგი 2014 წლიდან დაიწყო, მისი თქმით, ამ პროცესში მეოთხე მთავარ ცენტრად შესაძლოა ევროკავშირიც გვეხილა, თუმცა, ბრექსიტის პროცესმა ლიდერობას გარკვეულწილად ხელი შეუშალა”, - წერს გაზეთი "რეზონანსი“ სტატიაში სათაურით, ახალი მსოფლიო წესრიგი - როგორ აისახება ეს საქართველოზე
ფრაქცია „ნაციონალური მოძრაობის" წევრმა თინა ბოკუჩავამ პარლამენტში თემირლან მაჩალიკაშვილის საქმეზე დროებითი საპარლამენტო საგამოძიებო კომისიის შექმნის თაობაზე ინიციატივა დაარეგისტრირა. თინა ბოკუჩავა საქართველოს პარლამენტის საორგანიზაციო დეპარტამენტში მალხაზ მაჩალიკაშვილთნ ერთად მივიდა.
გენერალურმა პროკურორმა შალვა თადუმაძემ ოპოზიციონერი დეპუტატის, რომან გოცირიძის კითხვაზე, ვინ დაწერა „დიდოსტატის მარჯვენა“, უპასუხა, რომ არ იცის.
,,თქვენ ხართ უვიცი და თაღლითი", - ამ სიტყვებით ოპოზიციონერმა დეპუტატმა სალომე სამადაშვილმა უზენაესი სასამართლოს უვადო მოსამართლეობის კანდიდატს შალვა თადუმაძეს მიმართა და დიპლომის გაყალბებაში დადანაშაულა. ამის შემდეგ კომიტეტის თავმჯდომარემ ანრი ოხანაშვილმა სამადაშვილს მიკროფონი გაუთიშა.
ჟურნალისტმა თინა კანდელაკმა, რომელიც წლებია რუსეთში ცხოვრობს და კრემლის პოლიტიკის აქტიური მხარდამჭერია, Sputnik-თან საუბარში განაცხადა, რომ თუ უახლოეს 6 წელიწადში საქართველოს საგარეო კურსი რუსეთის მიმართულებით არ შეიცვლება ის ქართულ პოლიტიკაში მოსვლას განიხილავს, თუმცა ახლა ამისთვის მზად არ არის.
