მისი თქმით, პოლიტიკური ლიდერების საპატიმროში გამოკეტვას რამდენიმე მიზანი აქვს: ოპოზიციის კიდევ უფრო დასუსტება/განეიტრალება; ძალის დემონსტრირება, როგორც ქვეყნის შიგნით, ისე ქვეყნის გარეთ და პატიმრების სავაჭრო კაპიტალად გამოყენება, როცა ივანიშვილს შესაძლებლობა მიეცემა თავისთვის ხელსაყრელ პირობებზე ივაჭროს ცალკეულ პარტიებთან და დასავლეთთან.

როგორც ნინო კლანდაძე განმარტავს, ივანიშვილის მთავარ ამოცანას ახლა წარმოადგენს შეინარჩუნოს უპირობო ძალაუფლება ისე, რომ მას გარკვეული ლეგიტიმაცია მაინც ქონდეს. ამისთვის მას სჭირდება სავაჭრო ბერკეტები, რისთვისაც იდეალური ბერკეტია პოლიტიკური პატიმრები.

FirstNews.ge გთავაზობთ ინტერვიუს ნინო კალანდაძესთან:

- გიორგი გახარიას ემიგრანტობა იმაზე ხომ არ მიუთითებს, რომ მასაც ციხე ემუქრება?

- დიდი ალბათობით ამის ნიშანია. ვინაიდან, ცხადია, რომ ყველა ლოგიკით, მის მიმართ იგივე სტანდარტი და საპატიმრო სასჯელი იქნება გამოყენებული, როგორც ყველა დანარჩენის მიმართ, ვინც არ ცნო კომისიის ლეგიტიმაცია და არ გამოცხადდა იქ. იგი, ალბათ, თავის მხრივ ვაჭრობს რეჟიმის ლეგიტიმაციის სანაცვლოდ მოიპოვოს თავისუფლება. ამ თვალსაზრისით გახარია ყველაზე მარტივი სამიზნეა.

- ოპოზიციის ლიდერები რევოლუციური სცენარის განვითარებაზეც საუბრობენ, თქვენი აზრით, რამდენად შესაძლებელია ეს?

- რევოლუციის პერსპექტივას მე დიდი ხანია ვერ ვხედავ ამ ქვეყანაში. ამის პრევენციას კი აკეთებს სწორედ ივანიშვილი სახელმწიფოს მიტაცებისა და ძალაუფლების კონსოლიდაციის გზით. რევოლუციას სჭირდება ძალა, რესურსი და სახალხო მხარდაჭერა. არსებულ პოლიტიკურ ოპოზიციას არცერთი არ გააჩნია.

- როგორ შეიძლება განიმუხტოს პოლიტიკური კრიზისი?

- მთავარი ამოსავალი წერტილია, რომ შენარჩუნდეს რეჟიმის არალეგიტიმური სტატუსი. ამ პირობებში ჩვეულ დღის წესრიგს ვერ დაუბრუნდება „ოცნება“. ამასთან უნდა შენარჩუნდეს დასავლეთის ზეწოლა, რეჟიმის დასუსტების მიზნით. მხოლოდ ამ პირობებში იქნება ახალი არჩევნები შესაძლებელი. და მხოლოდ ახალი საპარლამენტო არჩევნებია გამოსავალი არსებული კრიზისიდან.