ოფიციალური თეირანის განცხადებით, უსაფრთხოების სამსახურის მიერ ჩატარებული ოპერაციების შედეგად დადგინდა, რომ მიგრანთა ნაწილი ირანში მოქმედ “საინფორმაციო ქსელებთან” იყო კავშირში, რომელთა უკან ისრაელის დაზვერვა დგას. მიგრანტების ნაწილს ბრალად ედება იარაღის გადაზიდვა, არეულობების მოწყობა და ჯაშუშობა უცხო ქვეყნების სასარგებლოდ.

დეპორტაციის პროცესები უკვე დაწყებულია. ირანელი ოფიციალური პირების თქმით, ბევრი ავღანელი ქვეყანაში არალეგალურად იმყოფება და ეროვნული უსაფრთხოებისთვის საფრთხეს წარმოადგენს.

ავღანეთის დროებითმა ხელისუფლებამ შეშფოთება გამოხატა. ქაბულში აცხადებენ, რომ მრავალი მიგრანტი, რომელსაც ირანი აძევებს, რამდენიმე წელია იქ ცხოვრობს და შრომით სექტორშია დასაქმებული. უფლებადამცველები შიშობენ, რომ მასობრივი დეპორტაცია, შეიძლება, ჰუმანიტარული კრიზისით დასრულდეს.

მიუხედავად ამისა, ირანი ამტკიცებს, რომ მოქმედებს “სუვერენული უფლების ფარგლებში” და უცხოელი მოქალაქეების შემოწმებას ეროვნული უსაფრთხოების კონტექსტში განაგრძობს.