როგორც უკრაინული მედია იუწყება, აღნიშნული განცხადება მან BFMTV-სთან ინტერვიუში გააკეთა.

ბაროს თქმით, ამერიკის პრეზიდენტმა, მისი ბოლო განცხადებების გათვალისწინებით, როგორც ჩანს, „მხარე აირჩია“ უკრაინის წინააღმდეგ მიმდინარე რუსეთის აგრესიაში.

„ვხედავ, რომ პრეზიდენტმა ტრამპმა ვლადიმერ პუტინს 50-დღიანი ულტიმატუმი მისცა ცეცხლის შეწყვეტის შესახებ ძალიან მკაცრი სანქციების მუქარით… ასევე აღსანიშნავია, რომ მან გამოთქვა მზადყოფნა, მიაწოდოს სამხედრო ტექნიკა უკრაინას“, – თქვა ფრანგმა მინისტრმა.

საფრანგეთის საგარეო საქმეთა სამინისტროს ხელმძღვანელმა ასევე განაცხადა, რომ ევროპული მხარე რამდენიმე კვირის განმავლობაში კოორდინაციას უწევდა თავის ქმედებებს „ამერიკელ სენატორებთან, რომლებმაც შეიმუშავეს სანქციების პაკეტი, მსგავსი იმისა, რაც ჩვენ ევროპულ დონეზე მივიღეთ“.

„ვიმედოვნებ, რომ ამერიკული სანქციების ეს პაკეტი… რაც შეიძლება მალე იქნება მიღებული“, – დასძინა ბარომ.

საფრანგეთის საგარეო საქმეთა მინისტრი 21-22 ივლისს კიევს, სუმსა და ხარკოვს ეწვია.

კიევში ვიზიტის დროს ბარომ პირობა დადო, რომ საფრანგეთი რუსეთის ლიდერ ვლადიმერ პუტინზე ზეწოლას გააგრძელებს.