აეროპორტების დახურვიდან რამდენიმე საათში რუსეთის ავიაციის სააგენტომ გაავრცელა განცხადება დაწესებული შეზღუდვების მოხსნისა და აეროპორტების გახსნის შესახებ.

რუსეთისვე მონაცემებით, გასულ ღამეს მათ 61 უკრაინული დრონი ჩამოაგდეს.

„7 ივნისის, მოსკოვის დროით 23:00 საათიდან 8 ივნისის, მოსკოვის დროით 07:30 საათამდე პერიოდში, მორიგე საჰაერო თავდაცვის სისტემებმა 61 უკრაინული თვითმფრინავის ტიპის უპილოტო საფრენი აპარატი გადაიჭირეს და გაანადგურეს“, - ინფორმაციას რუსეთის თავდაცვის სამინისტრო ავრცელებს. ამ წყაროს ცნობით, უკრაინული დრონები მათ ჩამოაგდეს ბრიანსკის, ბელგოროდის, კალუგის, ტულის, ორიოლისა და კურსკის რეგიონებში, ასევე მოსკოვის ოლქსა და ოკუპირებული ყირიმის ტერიტორიაზე.

ღია წყაროების მიხედვით, გასულ ღამეს უკრაინელებმა, რუსეთში, ტულის რეგიონში, კამიკაძე დრონებით დაარტყეს აზოტის ქარხანას, რომელიც აქტიურად თანამშრომლობდა რუსეთის სამხედრო ინდუსტრიასთან.

ასევე, დრონებით თავდასხმა მოაწყვეს ლოკომოტივზე, რომელსაც, ტანკები, ათეულობით ჯავშანმანქანა და სატრანსპორტო ტექნიკა გადაჰყავდა.