როგორც აშშ-ის საშინაო უსაფრთხოების მდივანმა, კრისტი ნოემმა სოციალურ ქსელ X-ზე დაწერა, ტრამპის ადმინისტრაციამ ჰარვარდის „სტუდენტური და გაცვლითი პროგრამის“ სერტიფიკაცია „კანონის შეუსრულებლობის“ გამო გააუქმა.

„ეს გაფრთხილება იქნება ქვეყნის მასშტაბით ყველა უნივერსიტეტისა და აკადემიური დაწესებულებისთვის“, – აღნიშნა მან.

თავის მხრივ, აღნიშნულ გადაწყვეტილებას ჰარვარდის უნივერსიტეტი განცხადებით გამოეხმაურა და ამ ნაბიჯს „უკანონო“ უწოდა.

„ჩვენ სრულად ვართ ვალდებულნი შევინარჩუნოთ ჰარვარდის შესაძლებლობა, უმასპინძლოს ჩვენს საერთაშორისო სტუდენტებსა და მეცნიერებს, რომლებიც 140-ზე მეტი ქვეყნიდან არიან და უსაზღვროდ ამდიდრებენ უნივერსიტეტს – და ამ ერს. ეს საპასუხო ქმედება სერიოზულ ზიანს აყენებს ჰარვარდის საზოგადოებას და ჩვენს ქვეყანას და ძირს უთხრის ჰარვარდის აკადემიურ და კვლევით მისიას“, – ნათქვამია განცხადებაში.

უნივერსიტეტის მონაცემებით, გასულ სასწავლო წელს დაწესებულებაში 6,700-ზე მეტი საერთაშორისო სტუდენტი ჩაირიცხა, რაც სტუდენტთა 27%-ს შეადგენს.