3 ივნისს სახელმწიფო დეპარტამენტში გამართულ ყოველდღიურ ბრიფინგზე მეთიუ მილერმა აღნიშნა, რომ აშშ განიხილავს საპასუხო ქმედებებს მას შემდეგ, რაც საქართველოს პარლამენტმა დაამტკიცა ე.წ. აგენტების კანონი.

"ჩვენ საკმაო შეშფოთება გამოვხატეთ იმის გამო, რომ ეს კანონი საქართველოს დემოკრატიული ტრაექტორიიდან გადაიყვანს, სამოქალაქო საზოგადოების სტიგმატიზაციას ახდენს და ახშობს გამოხატვისა და შეკრების თავისუფლებას. ეს ის ქმედებებია, რაც ფუნდამენტურად ცვლის აშშ-საქართველოს ურთიერთობებს. სწორედ ამიტომ, ჩვენ დავიწყეთ ჩვენი ურთიერთობების გადახედვა და განვიხილავთ საქართველოს ხელისუფლების საპასუხო ქმედებას", - განაცხადა მან.

ჟურნალისტმა მას დამატებით ჰკითხა, ცდება თუ არა თბილისის მერი კახა კალაძე, როდესაც ამბობს, რომ "არანაირი სანქციები არ იქნება", - რაზეც მილერი ასე პასუხობს:

"ჩვენ გამოვაცხადეთ სანქციების ახალი პოლიტიკა და ჯერ არ გამოგვიცხადებია ინდივიდუალური სანქციები. ამ საკითხზე მეტს არ ვისაუბრებ, მაგრამ ჩვენ მკაფიოდ ვთქვით, რომ არ ვიყოყმანებთ მათ [სანქციების] დაწესებაზე".

კიდევ ერთ კითხვაზე, თუ რატომ არ ახსენა საქართველო აშშ-ის სახელმწიფო მდივანმა აღმოსავლეთ ევროპაში ვიზიტის დროს, მილერმა თქვა, რომ ენტონი ბლინკენმა გამოაცხადა საქართველოსთან პოლიტიკის ყოვლისმომცველი გადახედვა, რომ რისკის ქვეშ არის ასობით მილიონი აშშ დოლარის დახმარება საქართველოსთვის და ასევე გამოაცხადა სავიზო აკრძალვების პოლიტიკა.

"გქონდეთ მოლოდინი, აშშ-ს ექნება რეაგირება ამაზე. ახლა ამას ასე დავტოვებ", - ამბობს მილერი.