როგორც კულებამ აღნიშნა, ბრიუსელში ორმხრივ შეხვედრებს გამართავს.

„ბრიუსელში ნატო-ს მინისტერიალში მონაწილეობის მისაღებად და მოკავშირეებთან ორმხრივი შეხვედრების გასამართად ჩამოვედი. ჩემი დღის წესრიგი მარტივია. იქ მხოლოდ სამი პუნქტია, ეს არის იარაღი, იარაღი და იარაღი. ჩვენ დარწმუნებული ვართ, რომ უკრაინის დახმარების საუკეთესო გზა ახლა ყველა იმ აუცილებლობით უზრუნველყოფაა, რაც საჭიროა პუტინის შესაჩერებლად და რუსეთის არმიის დასამარცხებლად უკრაინაში. ბოლო კვირების განმავლობაში უკრაინის არმიამ აჩვენა, რომ ჩვენ ვიცით, როგორ ვიბრძოლოთ, როგორ გავიმარჯვოთ, თუმცა იარაღის გარეშე. ამ გამარჯვებას თან უზარმაზარი მსხვერპლი სდევს. რაც უფრო მეტ იარაღს მივიღებთ და რაც უფრო სწრაფად ჩამოვა ის უკრაინაში, მით მეტი სიცოცხლე გადარჩება, ქალაქები და დასახლებები არ განადგურდება და აღარ იქნება მეტი ბუჩა. ეს არის ჩემი გზავნილი. მოვუწოდებ ყველა მოკავშირეს, გვერდით გადადონ მერყეობა და მიაწოდონ უკრაინას ყველაფერი, რაც სჭირდება, რადგან დღეს იარაღი მშვიდობის მიზანს ემსახურება. როდესაც საქმე ეხება უკრაინას, არ უნდა იყოს განსხვავება თავდაცვით და შეტევით იარაღს შორის, რადგან ყველა იარაღი, რომელიც უკრაინის ტერიტორიაზე გამოიყენება უკრაინის არმიის მიერ აგრესორის წინააღმდეგ, თავდაცვითია თავისი მნიშვნელობით. ეს განსხვავება თავდაცვითსა და შეტევითს შორის აზრს მოკლებულია, როდესაც ჩემს ქვეყანაში არსებულ ვითარებას ეხება საქმე“, – განაცხადა კულებამ.