როგორც „როიტერის“ ჟურნალისტები აცხადებენ, უკრაინელთა ცხედრებს ქუჩებსა და გზებზე პოულობდნენ. მათივე თქმით, დაღუპულები მშვიდობიანი მოქალაქეები არიან. ზოგიერთი მათგანის ცხედარი ველოსიპედთან იპოვეს, ზოგიერთს კი ხელში საყიდლების ჩანთა ეჭირა. ჟურნალისტების თქმით, გაუგებარია, რატომ არ დაკრძალეს ისინი რუსებმა.

ამასთან, როგორც „როიტერი“ ადგილობრივი მცხოვრებლებზე დაყრდნობით წერს, რუსები მშვიდობიან მოქალაქეებს გაუფრთხილებლად ესროდნენ.

ქალაქის მერის, ანატოლი ფედორუკის თქმით, ბუჩაში ნახეს საერთო სასაფლაო, სადაც 300-მდე ადამიანის ცხედარია ნაპოვნი. მისივე თქმით, რუსები მშვიდობიან მოსახლეობას არაადამიანური სისასტიკით ექცეოდნენ. ერთ-ერთი მშვიდობიანი მოქალაქის ცხედარი ხელებშეკრული იპოვეს.

ფედორუკის განცხადებით, რუსები მოქალაქეებს თავსა და კეფაში დამიზნებით კლავდნენ. მისივე თქმით, გარდაცვლილებს შორის არიან ქალები და 14 წლის ბავშვიც.

უკრაინული მხარის ინფორმაციით, ქუჩაში პოულობდნენ ცხედრებს, რომლებსაც დამწვრობის კვალი აღენიშნებოდათ, რაც მიუთითებს იმაზე, რომ რუსები ცხედრების დაწვით კვალის დაფარვას ცდილობდნენ. უკრაინელი სამხედროების მტკიცებით, ცხედრების დიდ ნაწილს აღენიშნება წამების კვალი.