„მე ვეტყვი პრეზიდენტ ზელენსკის, ისევე, როგორც ვუთხარი ბატონ პუტინს, რომ უკრაინის კრიზისთან დაკავშირებით მინსკის შეთანხმებებს პროგრესის მიღწევა შეუძლია. ამაზე პრეზიდენტ ზელენსკისთან ხვალ ვისაუბრებ“, – განაცხადა მაკრონმა.

ფრანგი ლიდერის თქმით, უკრაინის საკითხის გადაჭრა მხოლოდ პოლიტიკური გზით შეიძლება, მოხდეს და ამ გადაჭრის საფუძველი მინსკის შეთანხმებებია.

„საფრანგეთი გააგრძელებს მის ძალისხმევას ნორმანდიულ ფორმატში კრიზისის გრძელვადიანი მოგვარებისთვის“, – განაცხადა მაკრონმა.

საფრანგეთის პრეზიდენტის განცხადებით, ვლადიმერ პუტინთან შეხვედრისას მან განიხილა შეხების კონკრეტული წერტილები და დეესკალაციის გზები, რომლებსაც იგი შემდგომ უკვე ოფიციალურ კიევთან და ვაშინგტონთან, ასევე ევროკავშირისა და ნატო-ს მოკავშირეებთან განიხილავს.

„მომდევნო დღეები იქნება გადამწყვეტი და საჭიროებს ინტენსიურ დისკუსიას, რომელიც ერთად გვექნება“, – აღნიშნა მაკრონმა.

ფრანგი ლიდერის განცხადებით, პუტინთან ნარჩუნდება აზრთა სხვადასხვაობა ყველაზე მნიშვნელოვან საკითხებზე, მაგალითად ნატო-ს ღია კარის პრინციპთან დაკავშირებით.