უკრაინის პრეზიდენტმა ამერიკელ კანონმდებლებს მიაწოდა ინფორმაცია არსებული მოლაპარაკებების ფორმატებში - ნორმანდიის, სამმხრივი საკონტაქტო ჯგუფისა და მინსკის პროცესის ფარგლებში მშვიდობის მისაღწევად გადადგმული ნაბიჯების შესახებ.

უკრაინის პრეზიდენტის ადმინისტრაციის ინფორმაციით, შეხვედრაზე აღინიშნა სამშვიდობო პროცესში შეერთებული შტატების ჩართვის მნიშვნელობა.

„ახლა, როგორც არასდროს, მნიშვნელოვანია არა სიტყვები, არამედ გადამწყვეტი ქმედებები. ჩემი მიზანი უკრაინის აღმოსავლეთში სისხლისღვრის შეჩერებაა. შეუძლებელია ევროპაში უსაფრთხოების წარმოდგენა დონბასში ომის დასრულების გარეშე“, – აღნიშნა ზელენსკიმ.

მისი თქმით, არცერთ მესამე ქვეყანას არ აქვს უფლება, უკრაინის ნატო-ში ინტეგრაციის საკითხი დაბლოკოს.

„არანაირი შეთანხმება უკრაინაზე უკრაინის გარეშე. არცერთ მესამე ქვეყანას არ აქვს უკრაინის ნატოში ინტეგრაციის საკითხზე ხმის უფლება“, - აღნიშნა ზელენკსიმ.