როგორც სააგენტო „როიტერი“ წერს, პონტიფიკოსმა ორი ვიდეოგზავნილი გაავრცელა, რომელთაგან ერთი დედამიწის დღისადმი მიძღვნილ ღონისძიებას უკავშირდებოდა, მეორე კი აშშ-ის პრეზიდენტის, ჯო ბაიდენის ინიციატივით მიმდინარე კლიმატური სამიტისთვის.

„გლობალური კატასტროფები, კოვიდი და კლიმატური ცვლილება გვეუბნება, რომ ჩვენ მოცდის დრო აღარ გვაქვს. როგორც კოვიდმა გვასწავლა, ჩვენ გვაქვს ამ პრობლემისთვის წინააღმდეგობის გაწევის საშუალებები. დროა, ვიმოქმედოთ, ჩვენ ზღვარზე ვართ“, – განაცხადა რომის პაპმა, რომელმაც აღნიშნა, რომ გლობალური დათბობა ნაწილობრივ არის ადამიანების საქმიანობის შედეგი.

„ამ პანდემიამ ასევე გვაჩვენა, თუ რა ხდება, როდესაც მსოფლიო ჩერდება, შესვენებას აკეთებს, თუნდაც რამდენიმე თვით. სამწუხაროა, რომ ამას ბუნებაზე და კლიმატურ ცვლილებაზე დადებითი შედეგი აქვს. ეს მტკივნეულია’, – აღნიშნა პონტიფიკოსმა.

„მინდა ძველი ესპანური გამოთქმა გავიმეორო: „ღმერთი ყოველთვის პატიობს, ჩვენ ადამიანები ზოგჯერ ვპატიობთ, ბუნება კი არასდროს პატიობს“. როდესაც ბიძგს ვაძლევთ ბუნების ნგრევას, ამის შეჩერება ძალიან რთულია. თუმცა დრო ჯერ კიდევ არის. ჩვენ უფრო მდგრადები ვიქნებით, თუ ერთად ვიმუშავებთ და არა ცალცალკე“, – განაცხადა რომის პაპმა.

„ეს არის პრობლემა და თუ არ გავხდებით უკეთესები, თვითგანადგურების გზას დავადგებით“, – აღნიშნა ფრანცისკემ.