"გილოცავთ, მეგობრებო - დღეს მთავრობამ მორიგი დაპირება გახსნა! ლამაზი, ოპტიმისტური, "მოქნეული" დაპირება... მთლად "უფასო ფული", "100 ახალი ქარხანა" და "5 მილიონი ყველა სოფელს" ვერაა, მაგრამ, ნუ, 2022 წელია მაინც.

აი, ნახეთ:

"მთავრობა ენერგეტიკული პროექტების მხარდაჭერის სქემას წარადგენს, რომელიც მომდევნო სამი წლის განმავლობაში ჯამში, 1500 მეგავატი სიმძლავრის ელექტროსადგურების მშენებლობის ხელშეწყობას ითვალისწინებს";

ანუ წარადგენენ სქემას, რომელიც მხარს დაუჭერს პროექტს, რომელიც ხელს შეუწყობს "ოცნების" მიერვე გაყრილ ან შეშინებულ ინვესტორებს, რომ მომავალი სამი წლის განმავლობაში დაინტერესდნენ და ფულის მოტანა-ჩადებაზე დაიწყონ ფიქრი. რა ვიცი, მგონი კარგი დაპირებაა... მადლობა, ბატონო ირაკლი! მადლობა!

ანტიკორუფციულმა ბიურომ დაიწყო მუშაობა? თქვენი საათების ამბავი ხომ არ გარკვეულა? ნუნუკასთვის ნაჩუქარი ტყის? ჯერ არა? მოგიკითხავთ ხოლმე,"- წერს ზაზა ბიბილაშვილი.

შეგახსენებთ, რომ მთავრობამ ენერგეტიკული პროექტების მხარდაჭერის სქემა წარადგინა. როგორც პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა, მხარდაჭერის ახალი სქემა მოიცავს აუქციონის წესით მომდევნო სამი წლის განმავლობაში ჯამში 1500 მეგავატი სიმძლავრის ელექტროსადგურების მშენებლობის ხელშეწყობას. (ვრცლად იხილეთ ბმულზე)