სულ 17 პირია პასუხისგებაში მიცემული, მათგან 5 ბრალდებულს ჯგუფურად ჩადენილ განზრახ მკვლელობაში ედება ბრალი. ასევე მიმდინარეობს აგარაკზე მომხდარი ინციდენტის გამოძიება, რა დროსაც დაშავდნენ ვახტანგ ჩიქოვანი და ნ.ხ. სწორედ ამიტომ საქმეში ახალი მუხლები გაჩნდა, რაც განზრახ მსუბუქ დაზიანებას გულისხმობს. პროცესს არ ესწრებიან გიორგი შაქარაშვილის მშობლები. როგორც მათი ოჯახის წარმომადგენელი მირინა ნიკოლაძე ამბობს, ეს მათთვის მძიმე ასატანია:

"აქეთ გვიტევენ და გვლანძღავენ. შვილმკვდარ ოჯახს შეურაცხყოფენ. ჩვენ მხოლოდ სიმართლე გვაინტერესებს.

ოჯახის წევრები პროცესებზე სიარულს არ აპირებენ. მხოლოდ დაკითხვების დროს მივლენ. ძალიან ძნელია შენი შვილის მკვლელებს უყურო. სამწუხაროა, რომ არც ერთის ოჯახი სინანულს არ გამოხატავს, თავის დაძვრენის მიზნით ყველაფერს კადრულობენ", - განუცხადა "კვირის პალიტრას" მირიან ნიკოლაძემ.