გაეროს ბავშვთა ფონდის(UNICEF) ინფორმაციით, აღმოსავლეთ ევროპასა და ცენტრალურ აზიაში 4 მილიონი ბავშვი აღმოჩნდა სიღარიბეში უკრაინაში ომის და მზარდი ინფლაციის შედეგად. UNICEF-ის თანახმად, ბოლო ერთ წელიწადში ღარიბი ბავშვების რიცხვი 19%-ით გაიზარდა.
კიევის ცენტრში, შევჩენკოს რაიონში გრძელდება სამაშველო ოპერაცია. წინასწარი ინფორმაციით, უპილოტო საფრენი აპარატის გამოყენებით, საცხოვრებელ სახლზე განხორციელებული დარტყმის შემდეგ ნანგრევებში რჩება სულ მცირე 2 ადამიანი.
მორალური, პოლიტიკური და სამხედრო თვალსაზრისით, რუსეთი ომს აგებს, – ამის შესახებ განცხადება საგარეო პოლიტიკისა და უსაფრთხოების საკითხებში ევროკავშირის უმაღლესმა კომისარმა ლუქსემბურგში ევროკავშირის საგარეო საქმეთა მინისტერიალის დაწყებამდე გააკეთა. ბორელი ასევე გამოეხმაურა რუსთის მიერ კიევზე განხორციელებულ თავდასხმას.
ბრიტანეთის დაზვერვის ინფორმაციით, რუსულ თავდაცვით მრეწველობას არ შესწევს უნარი, იმ ტემპით აწარმოოს საბრძოლო მასალები, რა ტემპითა და რაოდენობითაც მას რუსეთი ხარჯავს, რის გამოც შემცირებულია შორ რადიუსზე მოქმედი რაკეტების რუსული მარაგები.
ჩეჩნეთის რესპუბლიკიდან ახლახან ჩასულმა ჯარისკაცებმა ლუგანსკის ოლქის ქალაქ რუბიჟნეში საკუთარი სახლებიდან მშვიდობიანი მოსახლეობის გამოსახლება დაიწყეს.
რუსეთის თავდაცვის სამინისტროს ინფორმაციით, ორმა პირმა, რომლებსაც უწყება დსთ-ს ერთ-ერთი ქვეყნის მოქალაქეებად მოიხსენიებს, ბელგოროდის რეგიონში სამხედრო პოლიგონზე მყოფ ადამიანებს ცეცხლი გაუხსნა. სროლის შედეგად 11 ადამიანი დაიღუპა, ხოლო 15 დაშავდა. რუსეთის თავდაცვის სამინისტრომ მომხდარს ტერაქტი უწოდა.
