„ვადასტურებ იმას, რომ 15 წლის ბავშვმა მიიყენა თვითდაზიანება“,- განუცხადა ჟურნალისტებს ლონდა თოლორაიამ პარლამენტში ადამიანის უფლებათა დაცვის კომიტეტის თავმჯდომარესთან სოფო კილაძესთან შეხვედრამდე.

ვრცელდება ინფორმაცია, რომ მას შემდეგ, რაც პოლიცია გაესაუბრა 15 წლის ლუკა სირაძის ყოფილ თანაკლასელებს სავარაუდო დამნაშავის ამოცნობის მიზნით და მათგან მოიპოვეს ინფორმაცია ლუკა სირაძის შესახებ, ერთ-ერთმა თანაკლასებლმა გოგომ თვითმკვლელობა სცადა.

15 წლის ლუკა სირაძე, რომელიც რამდენიმე დღის წინ, თვითმკვლელობის მიზნით მეცხრე სართულიდან გადახტა, 17 დეკემბერს საავადმყოფოში გარდაიცვალა.

თვითმკვლელობის მცდელობამდე მოზარდი „მწვანე სკოლაში“ კედლებზე წარწერების გაკეთების ფაქტზე გამოკითხეს დიდუბე-ჩუღურეთის პოლიციის პირველ განყოფილებაში.

12 დეკემბერს, სახელმწიფო ინსპექტორის სამსახურს მიმართა „ახალგაზრდა იურისტთა ასოციაციის“ ადვოკატმა, რომელიც მიუთითებდა პოლიციის განყოფილებაში არასრულწლოვნის მიმართ იძულების ფაქტზე.

17 დეკემბერს, სახელმწიფო ინსპექტორის სამსახურმა დააკავა დიდუბე-ჩუღურეთის პოლიციის პირველი განყოფილების გამომძიებელი მარიანა ჩოლოიანი, რომელსაც ბრალად ედება ჩვენების მიცემის იძულება.

https://www.radiotavisupleba.ge/