დატბორილია საცხოვრებელი სახლების პირველი სართულები, განადგურებულია ავეჯი და საყოფაცხოვრებო ტექნიკა. მოვარდნილმა წყალმა ადგილობრივების ვენახები და ბაღები თითქმის მთლიანად წაიღო, დაიხოცა ფრინველი. ადგილობრივი მოსახლეობა დახმარებას ითხოვს.  

„შემეშინდა და ძლივს გავასწარი რომ მეც არ დავეხრჩე. აქ იმხელა წყალი მოდიოდა მტკვარი გეგონებოდა, დაგლიჯა ყველაფერი, მანქანა შეიტანა ეზოში. ხეხილი სულ განადგურებულია. ქათმები გაწყვიტა. წიწილები დარჩა რისი შეყვანაც მოვასწარი, მაგრამ მერე რომ ვნახე მეც დავიხრჩობოდი დავანებე თავი,“-ამბობს ადგილობრივი ვანო ოხანაშვილი.

მოსახლეობა ამბობს, რომ ჯერ ზარალის დამდგენ კომისიას მუშაობა არ დაუწყია. მათი თქმით, ზარალი ძალიან დიდია და ახლა სახელმწიფოსგან დახმარების იმედი აქვთ. ადგილზე მოსახლეობას გარდაბნის მუნიციპალიტეტის გამგებელიც შეხვდა. 

სოფელ ლემშვენიერას მოსახლეობა ამბობს, რომ მათი საცხოვრებელი სახლები სტიქიის ზონაშია. სოფელში სვანეთიდან ჩამოსახლებული ეკომიგრანტები ცხოვრებენ. მათი თქმით, მოსახლეობა თავს უსაფრთხოდ ვეღარ გრძნობს.

"არ ვიცი რატომ მოხდა აქ ჩასახლება, ალბათ იზრუნებენ ამაზე, გაკეთდა ჯებირები ადრე, მაგრამ ამან გამოიწვია დატბორვა და ეს დატბორილი ყინულის და სეტყვის მასამ შემოანგრია ღობეები, ჩახოცა პირუტყვი,"-ამბობს დაზარალებული მარინა კორძაია. 

http://rustavi2.ge