დაჯილდოების ცერემონია ლადო მესხიშვილის სახელობის სახელმწიფო დრამატულ თეატრში შედგა.

საქართველოს თეატრის მოღვაწეთა კავშირის ორგანიზებით, ქართული თეატრის მხარდაჭერისთვის „ამაგდარისა“ და „ქომაგის“ წოდებები გაიცა. ქომაგის ჯილდო ქუთაისის მერის მოვალეობის შემსრულებელს დავით ერემეიშვილს, ხოლო ამაგდარის წოდება მერიის კულტურის, განათლების, სპორტისა და ახალგაზრდობის სამსახურის უფროსს ელეონორა გოგოლაშვილს მიენიჭა.

ჟიურის გადაწყვეტილებით, ფესტივალის საუკეთესო სპექტაკლის მთავარი პრიზი თერჯოლის სახალხო თეატრს გადაეცა, ასევე, გამოვლინდნენ სხვადასხვა ნომინაციაში გამარჯვებული მუნიციპალური და სახალხო თეატრები.

ფესტივალი 18 ივნისს ქუთაისის თეატრის სპექტაკლით გაიხსნა და 2 ივლისს ჭიათურის აკაკი წერეთლის სახელობის სახელმწიფო თეატრის სპექტაკლით დაიხურა.

ფესტივალის ფარგლებში გამოიცა ჟურნალის „თეატრალური ქუთაისის“ ახალი, 28-ე ნომერი, რომლის პრეზენტაციაც მესხიშვილის თეატრის ფოიეში მოეწყო.