როგორც სერგეენკომ ჟურნალისტებს განუცხადა, კორონავირუსის ტალღების თვლა და შტამების დევნა შედეგს ვერ გამოიღებს, თუ საზოგადოება ელემენტარულ რეკომენდაციებს არ დაიცავს.

მეტი ვიზუალიზაციისთვის, რომ ნიღაბი ვირუსისგან ადამიანს ნამდვილად იცავს, სერგეენკომ მედიის წარმომადგენლებთან გარკვეული ცდა ჩაატარა. მან ნიღაბზე სადეზინფექციო ხსნარი დაასხა, რითაც აჩვენა, რომ ნიღბის შიგნით ხსნარმა ვერ შეაღწია.

„დამერწმუნეთ, არანაირი მნიშვნელობა არ აქვს ტალღების რაოდენობის რიგითობის თვლას და შტამების დევნას, უბრალოდ, ის რეკომენდაციები, რაც მთელს მსოფლიოშია გავრცელებული, დასაცავია ყველასთვის. ვაქცინაციას რაც შეეხება, ამას მართლაც დიდი საინფორმაციო კამპანია სჭირდება, მაგრამ ნიღაბი მარტივი რაღაც არის. ერთ-ერთი არგუმენტია, რომ ვირუსი უფრო პატარაა, ვიდრე ნიღაბი და აზრი არ აქვს ნიღბის ტარებას. ვირუსი აირწვეთოვანი გზით გადამცემია და არა აიროვანი, როგორიცაა წითელა, რომლის დროსაც ნიღბის ტარებას აზრი არ აქვს. აირწვეთოვანი ინფექციებისას ნიღაბში ვირუსი ვერ აღწევს. ნიღაბი მაინც ატარეთ! ახლა ნიღბის ტარებით 30%-ზე ვართ. ეს წარმოუდგენლად დაბალი მაჩვენებელია“, - განაცხადა დავით სერგეენკომ.