როგორც ცნობილია, ლევან ვარშალომიძე უკრაინიდან საქართველოში დაბრუნდა და ამჟამად ბათუმში, საკარანტინო რეჟიმის ზონაში იმყოფება.

იბადება კითხვა - გამოდის, რომ მან უკრაინაში სახელმწიფო სამსახური მიატოვა? ლევან ვარშალომიძე ხომ პრეზიდენტ ვლადიმერ ზელენსკის ბრძანებით, უკრაინის ერთიანი საინვესტიციო ოფისის ხელმძღვანელად რამდენიმე თვის წინ დაინიშნა...

როგორც ირკვევა, აჭარის ავტონომიის ექს-ხელმძღვანელს ამ საქმეში არ გაუმართლა. მან თურმე საინვესტიციო ოფისის შენობის გაფორმებაც კი ვერ შეძლო.

როგორც ერთ-ერთმა წყარომ  „სტრანა“-ს აცნობა, ლევან ვარშალომიძე თავისი ოფისის - „ინვესტნიან“-ის შექმნას ქარხანა „არსენალის“ ერთ-ერთ კორპუსში აპირებდა, რომელიც კულტურის სამინისტროს ბალანსზე იმყოფება. გარდა ამისა, ვლადიმერ ზელენსკისთან შეხვედრისას მან შესჩივლა პრეზიდენტს, რომ ხუთი თვეა უხელფასოდ მუშაობს და მას უკვე ეს ყველაფერი ყელში ამოუვიდა.

„ვლადიმერ ზელენსკისთან შეხვედრის შემდეგ ლევან ვარშალომიძეს პრემიერ-მინისტრმა დენის შმიგალმაც დაურეკა, მაგრამ სიტუაცია არ შეცვლილა“, - ამბობს წყარო, - „მას საქმე იმითაც გაურთულდა, რომ უკრაინის მინისტრთა კაბინეტმა ქვეყანაში უცხოელების შესვლა აკრძალა, რამაც ნეგატიური გავლენა მოახდინა საინვესტიციო ოფისის მუშაობაზე“.

მოკლედ, როგორც ჩანს, ლევან ვარშალომიძეს უკრაინაში ყურადღებას აღარ აქცევენ, შესაბამისად, მან თავისი უკრაინული სამსახური მიატოვა და ბედის საძებნელად სამშობლოს დაუბრუნდა.

წყარო: https://strana.ua/news/286889-levan-varshalmildze-vernulsja-v-hruziju.html

მოამზადა სიმონ კილაძემ