მისივე განცხადებით, რუსეთის დელეგაცია თბილისში საპროტესტო აქციებს და უწესრიგობებს არ ელოდა. მისივე ინფორმაციით, საპარლამენტთაშორისო ასამბლეის დელეგაციებმა უსაფრთხოების წერილობითი გარანტიები მიიღეს, თუმცა მას გადასცეს ოპოზიციის ლიდერის განცხადება, რომლის თანახმადაც „გავრილოვის სტუმრობა არასასურველია, რადგან ის მონაწილეობდა საბრძოლო მოქმედებებში აფხაზეთში“. გავრილოვი აცხადებს, რომ ეს ბრალდება შეცდომაა.

„არასდროს ამიღია ხელში იარაღი და მონაწილეობა არ მიმიღია საბრძოლო მოქმედებებში. ხოლო ცხელ წერტილებში მხოლოდ ჰუმანიტარული მისიით, ქრისტიანების დასახმარებლად ვარ ნამყოფი“, - აღნიშნა გავრილოვმა.

მისი თქმით, არც ერთმა ქართულმა არხმა არ უარყო მის წინააღმდეგ მცდარი ბრალდება, პირიქით, დაიწყეს საუბარი იმაზე, რომ რუსები ოკუპანტები არიან.

რუსი დეპუტატის თქმით, ოპოზიციის განსაკუთრებული უკმაყოფილება გამოიწვია მისმა პარლამენტის სპიკერის სავარძელში ჩაჯდომამ, თუმცა ეს პროტოკოლს შეესაბამებოდა და ასე ხდება ყველა ქვეყანაში.

„ისე რა სავარძელი იყო, არც მაინცდამაინც მყუდრო და კომფორტული. თუმცა ჩვენ მოკრძალებული ხალხი ვართ ტაბურეტებზე დამსხდრებსაც შეგვიძლია მუშაობა“,- განაცხადა სერგეი გავრილოვმა.

მანამდე გავრილოვმა აღნიშნა, რომ საქართველოში ბევრი პოლიტიკოსი მუშაობს რუსეთთან ურთიერთობის გაუმჯობესაბაზე, მაგრამ ქვეყანაში რადიკალებისა და ექსტრემისტების გავლენა ძალიან ძლიერია და ვიდრე ხელისუფლება წესრიგს არ დაამყარებს და ბოდიშს არ მოუხდის რუსეთს და სხვა ქვეყნებს მომხდარისთვის, რუსებისთვის საქართველში მოგზაურობა არ ღირს.