როგორც მან პოლონეთის საგარეო საქმეთა მინისტრთან ოპოზიციის შეხვედრამდე ჟურნალისტებს განუცხადა, ოპოზიციურმა პარტიებმა გაერთიანების კარგი მაგალითი მარტში განვითარებული მოვლენების დროს აჩვენეს.

“მგონია, რომ კონსოლიდაცია არის მნიშვნელოვანი, როცა ასეთი ტიპის რეჟიმს ებრძვი იმიტომ, რომ რესურსები არის მწირი, ყველას უჭირს, არავის ფული არ აქვს, მათ შორის კოორდინაცია, თუნდაც დეზინფორმაციასთან ბრძოლაში ცალსახად ძალიან მნიშვნელოვანია. თუ რაიმე წარმატების ფორმულა ვაჩვენეთ ჯამში ამ ქვეყნის მოქალაქეებმა, ეს იყო მარტის დასაწყისში განვითარებული მოვლენები, როცა კონსოლიდირებული იყო მთელი პოლიტიკური სპექტრი, მთელი სამოქალაქო სექტორი და ჯამში, მთელი საზოგადოება. ამაზე უკეთესი წარმატების ფორმულა ჯერჯერობით არ დაგვიდია”, – განაცხადა ჯაფარიძემ.

მან საქართველოში ევროპელი დიპლომატების ვიზიტებიც შეაფასა და განმარტა, რომ ქვეყანა ყურადღების ქვეშაა.

“ყურადღების ქვეშ ვართ და დასავლეთს ეს ქვეყანა მიტოვებული არ ჰყავს, მაგრამ იმის იმედი, რომ ამის გამო “ქართული ოცნების” პოლიტიკა შეიცვლება, ეს არის ილუზია, არ შეიცვლება. ხელისუფლება უნდა შეიცვალოს და მერე შეიცვლება პოლიტიკა”, – განაცხადა ჯაფარიძემ.