მაჭარაშვილის თქმით, “ლელო - ძლიერი საქართველო” და “გახარია საქართველოსთვის”, რომ “ნაციონალურ მოძრაობასთან” აფილირებული არიან, ეს საგამოძიებო კომისიაზე დადასტურდა.

„მიკვირს, "ლელო-გახარიას" პოლიტიკურ ნაბიჯებში ლოგიკას რომ ეძებთ. თუ ამას ხუმრობით კითხულობთ, გეტყვით, რომ მათ თავიდანვე არ სჯეროდათ, რომ საკრებულოებში სერიოზული კვოტები ექნებოდათ. ისინი ამბობდნენ, რომ მონაწილეობას რევოლუციაშიც იღებდნენ და არჩევნებშიც. ანუ, ე, მანდ, თუ რაიმე 16:00 საათის შემდეგ გადატყდებოდა, შემდეგ რევკომის მხარეს დადგებოდნენ. ამის ილუზია არავის ჰქონდა, მაგრამ მათი მარცხის მიზეზი იმაშია, რომ ეს ხალხი ერთმანეთს არ ენდობა. მანჯგალაძემ თქვა, სურათის გადაღების გარდა საერთო არაფერი გვქონდაო. ჩვენ ამ ძალებს [“ლელო - ძლიერი საქართველო” და “გახარია საქართველოსთვის”] უკვე სერიოზულად აღარ აღვიქვამთ. რამდენიმე დღეში, საკონსტიტუციო სასამართლოში სარჩელი იქნება შეტანილი. დროებით საგამოძიებო კომისიაზე უამრავი მტკიცებულება იყო და 4 ოქტომბერი ზედ დადებული მტკიცებულება იქნება, რომ ეს ხალხი სახელმწიფოს წინააღმდეგ იბრძვის. შესაბამისად, “ნაცმოძრაობა” თავის ფილიალებთან ერთად აუცილებლად გაუქმდება, როგორც პოლიტიკური პარტიები. ამას დიდი მსჯელობა არ დასჭირდება. რატომ უნდა გვაინტერესებდეს ასეთი ე.წ პოლიტიკური პარტიების მოსაზრებები თუნდაც დღეს”, - განაცხადა გურამ მაჭარაშვილმა.

კითხვაზე, მოხვდება თუ არა საკონსტიტუციო სარჩელში “ლელო ძლიერი საქართველო” და “გახარია საქართველოსთვის”, მაჭარაშვილმა უპასუხა, რომ “ნაცმოძრაობა” თავისი სატელიტებით აუცილებლად უნდა ჩამოსცილდნენ ქართულ პოლიტიკას, ხოლო სატელიტები სარჩელში დაკონკრეტდება.

„ჩვენ არაერთხელ გვითქვამს ის, რომ სამწუხარო მოცემულობაა, რომ “ნაცმოძრაობასთან” ისინი აფილირებული არიან, რაც კომისიაზე დადასტურდა. მათ შორის - “ლელოც” და გახარიაც. საკონსტიტუციო სასამართლოს ნაცვლად მე ვერ ვიმსჯელებ. “ნაცმოძრაობა” თავისი სატელიტებით აუცილებლად უნდა ჩამოსცილდნენ ქართულ პოლიტიკას. სატელიტებს დაგიკონკრეტებთ სარჩელში. მერე გთხოვთ, რომ სარჩელი წაიკითხეთ, იმეცადინეთ და მობრძანდით”, - განაცხადა მაჭარაშვილმა.