მისი თქმით, ადამიანებმა, რომლებიც საკუთარ ხალხს ჩაგრავენ, პოლიტიკური ფასი უნდა გადაიხადონ და “ MEGOBARI აქტი” ამ თვალსაზრისით „უნივერსალური ინსტრუმენტი იქნება”.

„MEGOBARI აქტი” არის ძალიან მნიშვნელოვანი აქტი იმიტომ, რომ ხშირად გვავიწყდება ერთი რამე: ამერიკის შეერთებულ შტატებს ბიძინა ივანიშვილი და ოთარ ფარცხალაძე დასანქცირებული ჰყავს როგორც რუსეთის სასარგებლოდ ჯაშუშურ და ქართული დემოკრატიისთვის ძირგამომთხრელ საქმიანობაში შემჩნეული პირები. ახლა “ქართული ოცნება” ხავსს ეჭიდება, რომ ეს წინა ადმინისტრაციის პირობებში იყო. ამიტომ მნიშვნელოვანია ეს აქტი, რომელსაც ორპარტიული მხარდაჭერა აქვს. ეს მნიშვნელოვანია იმისთვის, რომ “ქართულ ოცნებას” გაეფანტოს ილუზიები, რომ ვიღაცის, ლობისტების საშუალებით რამეს მოივაჭრებენ. ამიტომ, 27 მარტს დაიწყება ამ აქტის განხილვა და როდესაც ეს აქტი მიიღება ეს ნიშნავს, რომ კანონის დონეზე აეკრძალება ამერიკის ადმინისტრაციას ამათთან ურთიერთობა. ანუ ესენი იქნებიან სრული კეთროვანები საერთაშორისო თვალსაზრისით. შესაბამისად, გაცილებით უფრო მძიმე პოლიტიკურ მდგომარეობაში აღმოჩნდებიან. ადამიანებმა, რომლებიც საკუთარ ხალხს ჩაგრავენ, სცემენ, აუბედურებენ, დიდი პოლიტიკური ფასი უნდა გადაიხადონ. სამართლებრივიც, თუმცა ჯერ პოლიტიკური. „მეგობარი აქტი“ ამ თვალსაზრისით უნივერსალური ინსტრუმენტი იქნება”, - განაცხადა გიგი უგულავამ.