ზარქუას თქმით, აბუ-დაბის სასამართლომ დააჯარიმა, თუმცა არ ასახელებს ჯარიმის ზუსტ ოდენობას. მისი სიტყვებით, თანხა ადგილზე მეგობარმა გადაიხადა, თავად კი ამ 3-4 ათასი დოლარის გადახდას რამენაირად მოახერხებს.

"გვეცინებოდა, უსამშობლოები თუ მათთან აფილირებული პოლიტოლოგები რომ ამბობდნენ, 1 წელი მიუსაჯეს, 80 ათასი დოლარი, სიგიჟეებს რომ ჰყვებოდნენ. არაფერი, ჯარიმა გამოიწერა დირჰამებში, 10-15-ჯერ ნაკლები. იქ ჩვენ მეგობრები გვყავდა, ვინც გადაიხადა და ამ 3-4 ათას დოლარს ჩვენ, ბუნებრივია, გადავიხდით. ახლა თბილისში ვარ და რამენაირად მოვახერხებ", - აღნიშნა ზარქუამ.

მანვე თქვა, რომ არ იცნობს იმ პირს, რომელმაც ინციდენტის დროს თეფში ისროლა.

"საკმაოდ მკაცრი კანონები აქვთ, შესაბამისად, გამოძიება დაიწყო, თან დამძიმებული ის [მუხლი] ჰქონდა, აქედან კარნახობდნენ, ეტყობა, რომ ორგანიზებული ჯგუფური თავდასხმა, დეპუტატების გარდა, სხვაც მონაწილეობდაო. ვიღაც ახალგაზრდა იყო, იქ ბევრი ქართველი ისვენებდა. ეტყობა, იმდენად ამოუვიდა ყელში ეს პროვოკაციები, თეფში ისროლა თუ რაღაცა. არც ვიცნობ იმ ადამიანს, როგორ მოხვდა იქ. შემდეგ სასამართლო ჩაინიშნა და ჯარიმის საფუძველზე მოგვეცა შესაძლებლობა, დაგვეტოვებინა აბუ-დაბი", - ჰყვება ზარქუა "იმედის" ეთერში.