საქართველოს პარტნიორი ქვეყნის პრეზიდენტი იმედგაცრუებულია და საქართველოს მთავრობის გადადგმულ ნაბიჯებს ანტიდემოკრატიულად აფასებს. სალომე ზურაბიშვილისთვის გაგზავნილ წერილს საქართველოს პრეზიდენტის ადმინისტრაცია ავრცელებს. 

„მინდა, ასევე, აღვნიშნო ქართველი ხალხის მკაფიო ნება, რომელიც განაგრძობს თავისი ევრო-ატლანტიკური მისწრაფებების გამოხატვას. შეერთებული შტატები მიესალმება დემოკრატიული მომავლისადმი საქართველოს მოსახლეობის ურყევ ერთგულებას, რაშიც მნიშვნელოვანი წვლილი შეაქვს სამოქალაქო საზოგადოებას განსხვავებული შეხედულებებისა და მოსაზრებების გამოხატვით.

იმედგაცრუებული ვარ საქართველოს მთავრობის ანტიდემოკრატიული ქმედებებით, რომლის მაგალითსაც წარმოადგენს კრემლის სტილის „უცხოური აგენტების“ კანონი და საქართველოს მთავრობის ოფიციალური პირების ცრუ განცხადებები, რაც არ შეესაბამება ევროკავშირისა და ნატოს წევრობის ნორმებს. მიუხედავად ამ ნაბიჯებისა, ერთგულნი ვრჩებით საქართველოს მოსახლეობის და მისი ევროატლანტიკური მისწრაფებების მიმართ“, - აღნიშნულია საქართველოს პრეზიდენტისთვის მიწერილ წერილში.

ბაიდენი აღნიშნავს, რომ საქართველოსა და აშშ-ის საერთო ღირებულებები აერთიანებთ და 32-წლიანი ორმხრივი ურთიერთობის განმავლობაში საქართველო და შეერთებული შტატები „ერთად ვიცავთ მშვიდობას, სტაბილურობას, თავისუფლებასა და ადამიანის უფლებებს“.