საქართველოს პრეზიდენტმა ორბელიანების სასახლის წინ დამოუკიდებლობის დღის აღსანიშნავ ღონისძიებაზე წარმოადგინა გეგმა, რომელიც საარჩევნოდ "არ გულისხმობს არც ერთიან სიას და არც რაიმე სხვა ფორმით აუცილებელ გაერთიანებებს". ამ ღონისძიებას პოლიტიკური პარტიების წარმომადგენლებიც ესწრებოდნენ.

პარტია "ახლის" ერთ-ერთი ლიდერის, ნიკა გვარამიას განცხადებით, სალომე ზურაბიშვილის მიერ ინიციირებულ ტექსტში მიუღებელი არაფერია და პარტია მას შეუერთდება. „'ახალი' ქარტიას ხელს მოაწერს", - თქვა ნიკა გვარამიამ.

პარტია "ევროპული საქართველოს" ერთ-ერთი ლიდერი გიგა ბოკერია ძალიან დადებითად აფასებს ქარტიის სულისკვეთებას. "აპრიორი შემიძლია ვთქვა, რომ ჩვენ და ყველა პასუხისმგებელი პოლიტიკური ძალა უნდა შეუერთდეს ამ გზავნილს."