ანი გაბეჩავამ ისაუბრა 18 ივნისს, მის დაბადების დღეზე განვითარებულ მოვლენებზე, სადაც ასევე შაქარაშვილიც იმყოფებოდა. გაბეჩავას განმარტებით, დამნაშავეებს ხელს არ დააფარებს.

„ეს ყველაფერი უშუალოდ მართლა მე მეხება, რადგან ჩემს დაბადების დღეზე მოხდა და ამის შემდეგ მეც ძალიან ცუდად ვარ, ძალიან განვიცდი ამ ამბავს. ეს მინდოდა მეთქვა... იცოდეთ, რომ არცერთი წამით არ მაქვს გულგრილი დამოკიდებულება ამ ამბის მიმართ, არცერთ მათგანს არ დავაფარებ ხელს და არ დავიცავ, ვინც ამ ყველაფერში დამნაშავეა. პირველ რიგში, ჩემი ცხოვრება ძალიან შეიცვალა. სრულიად ახალ ეტაპზე გადავდიოდი , ვერც ეროვნულ გამოცდებზე გავედი, მაგრამ ამას აღარ აქვს მნიშვნელობა, რაც მოხდა ალბათ, ასე უნდა მომხდარიყო“, - განაცხადა გაბეჩავამ.

შეგახსენებთ, რომ ფეხბურთელი გიორგი შაქარაშვილი რამდენიმედღიანი ძებნის შემდეგ მდინარე არაგვში გარდაცვლილი იპოვნეს. ექსპერტიზის დასკვნით, გიორგი შაქარაშვილის სიკვდილის მიზეზია ასფიქსია წყალში დახრჩობით. ფეხბურთელის გარდაცვალების საქმეზე უკვე არსებულ კვალიფიკაციას დამამძიმებელ გარემოებებში ჯგუფურად განხორციელებული განზრახ მკვლელობა დაემატა. საქმეზე 17 პირია დაკავებული.