"რუსეთმა ომი სხვებს მოუტანა და ახლა ომი სახლში ინაცვლებს. უკრაინას ყოველთვის მხოლოდ მშვიდობა სურდა და ჩვენ მშვიდობას ნამდვილად უზრუნველვყოფთ", - თქვა ზელენსკიმ 12 აგვისტოს საღამოს ვიდეომიმართვაში. "რუსეთი იძულებული უნდა გახდეს, დათანხმდეს მშვიდობას, თუკი რუსეთის პრეზიდენტ ვლადიმირ პუტინს ასე ძალიან უნდა ომი", - ამბობს უკრაინის ლიდერი.

ზელენსკი გამოდის სამშვიდობო გეგმით, რომელიც მოიცავს რუსეთის ძალების გასვლას უკრაინის ოკუპირებული ტერიტორიებიდან. თუმცა პუტინი კვლავ თავის პოზიციაზეა - უკრაინამ რუსეთს უნდა გადასცეს აღმოსავლეთის და სამხრეთის ოთხი რეგიონი, რომლებიც რუსეთს ნაწილობრივ ოკუპირებული აქვს და რომლებზეც მთლიანად აცხადებს პრეტენზიას. პუტინის ამ პოზიციას კიევი გადაჭრით უარყოფს.

ზელენსკის თქმით, საზღვრის მიღმა, რუსეთში, წარმოებული ოპერაცია წარმოადგენს "მხოლოდ უსაფრთხოების საკითხს" მისი ქვეყნისთვის. უკრაინის პრეზიდენტის განცხადებით, მისმა ძალებმა დაიკავეს ის საზღვრისპირა არეალები, რომლებსაც რუსეთი იყენებდა უკრაინის სუმის რეგიონის წინააღმდეგ 2100-მდე თავდასხმაში, 1 ივნისის შემდეგ.

სირსკიმ საზღვრის მიღმა ოპერაციის შესახებ თავის პირველ საჯარო გამოსვლაში 12 აგვისტოს თქვა, რომ კურსკის რეგიონში მისი ძალები აკონტროლებენ 1000-მდე კვადრატულ კილომეტრს.