როიტერსს მოჰყავს კონგრესის მრჩევლის სიტყვები, რომ შეტყობინება გაეგზავნა კონგრესს აშშ-ის 1973 წლის კანონის შესაბამისად, რომელსაც „ომის უფლებამოსილების რეზოლუცია“ ან „ომის უფლებამოსილების აქტი“ ეწოდება, და რომელიც პრეზიდენტის მიერ შეიარაღებული ძალების ამოქმედების პირობებს განსაზღვრავს.

კანონი პრეზიდენტის ადმინისტრაციისგან მოითხოვს, 48 საათის განმავლობაში აცნობოს კონგრესს შეიარაღებული ძალების საბრძოლო მოქმედებაში მოყვანის შესახებ ან დაგეგმილი ოპერაციის თაობაზე.

დემოკრატიული პარტიის წევრმა კანონმდებლებმა შეუტიეს ტრამპს რადგან მან არ მოითხოვა კონგრესისგან წინასწარი თანხმობა, ან არ შეატყობინა მას თავდასხმის თაობაზე და გამოთქვეს შეშფოთება, რომ ამ აქციამ აშშ შეიძლება ირანთან ომამდე მიიყვანოს.

თეთრს სახლს ანგარიშის შესახებ ცნობის გარშემო კომენტარი არ გაუვრცელებია, მოელოდნენ, რომ ეს კვირის ბოლოს მოხდებოდა.

მოელოდნენ, რომ აშშ-ის ადმინისტრაციას უნდა განემარტა ვითარება, რომელი უწყება წარმართავდა თავდასხმას, ასევე ის, თუ რამდენ ხანს გაგრძელდებოდა სამხედრო მისია.

ტრამპმა განაცხადა, რომ თავდასხმის განკარგულება გასცა, რათა „ომი შეეჩერებინა“ და რომ სოლეიმანი „გარდაუვალი და სასტიკ“ თავდასხმებს გეგმავდა აშშ-ის ინტერესების და მისი მოკავშირეების წინააღმდეგ.

62 წლის სოლეიმანი ირანის „ყუდსის ძალების“ სარდალი იყო. ეს ძალები ირანის ისლამური რევოლუციური გვარდიის ნაწილია, რომელიც უცხოეთში მოქმედებს. „გვარდია“ აშშ-ს უცხოეთის ტერორისტული ორგანიზაციების სიაში ჰყავს შეყვანილი.