Fox News-თან საუბრისას ტრამპმა აღნიშნა, რომ მისი 2021 წლის 6 იანვრის გამოსვლა „დაჩეხეს“ და ისე წარადგინეს, რომ მაყურებელი შეცდომაში შევიდა.

„მათ შეცვალეს ჩემი 6 იანვრის გამოსვლა, რომელიც იყო მშვენიერი, ძალიან დამამშვიდებელი გამოსვლა და ისე გააკეთეს, რომ რადიკალურად ჟღერდა. სინამდვილეში, შეცვალეს. რაც გააკეთეს, საკმაოდ წარმოუდგენელი იყო“, - აღნიშნა ტრამპმა.

კითხვაზე, გააგრძელებს თუ არა სამართლებრივ ქმედებებს, აშშ-ის პრეზიდენტმა უპასუხა: „ვფიქრობ, რომ ვალდებული ვარ, ეს გავაკეთო“.

ცნობისთვის, დონალდ ტრამპის ადვოკატებმა BBC-ს წერილი მისწერეს, სადაც აღნიშნულია, რომ 1 მილიარდი აშშ დოლარის ოდენობის ზარალის გამო იჩივლებენ, თუ კორპორაცია ბოდიშს არ მოიხდის და კომპენსაციას არ გადაიხდის.

BBC-ის პასუხის გასაცემად ვადა პარასკევს, ადგილობრივი დროით 22:00 საათამდე აქვს განსაზღვრული. BBC-მ განაცხადა, რომ პასუხს დროულად გასცემს.