დნეპროპეტროვსკის საოლქო-სამხედრო ადმინისტრაციის ცნობით, უპილოტო საფრენი აპარატებით დარტყმის შედეგად კამენსკის რაიონში ორი მშვიდობიანი მოქალაქე დაიღუპა, ხოლო პავლოგრადის რაიონში - ერთი.

დაზიანებულია კერძო სახლები, ადმინისტრაციული შენობა და მაღაზია. გაჩნდა ხანძრები. უკრაინის რკინიგზის ინფორმაციით, პავლოგრადში დაღუპული 52 წლის კაცი მატარებლის მემანქანე იყო. მისი თანაშემწე დაჭრილია.

დონეცკის ოლქში დრონებით დარტყმა იყო მოხალისეთა ავტომანქანაზე, რომლითაც როდინსკის რაიონიდან ევაკუირებული მოქალაქეები გადაჰყავდათ. საოლქო პროკურატურის ცნობით, დაიჭრა სამი ადამიანი. ამავე ოლქის ქალაქ კონსტანტინოვკაზე მართვადი ავიაბომბებით დარტყმის შედეგად ერთი მშვიდობიანი მოქალაქე დაიღუპა და ოთხი დაშავდა. დაზიანებულია 15-ზე მეტი სახლი.

ადგილობრივი ხელისუფლების ცნობით, მართვადი ავიაბომბებით დარტყმა იყო ზაპოროჟიეს ოლქის სტეპნოგორის რაიონზე, სადაც ერთი ადამიანი დაიღუპა. ნაწილობრივ დანგრეულია მრავალბინიანი სახლი.

დრონებით შეტევა იყო ხარკოვის ოლქის ქალაქ ჩუგუევზე, სადაც ოთხი ადამიანი დაშავდა. ადგილობრივი ხელისუფლების ინფორმაციით, დაზიანებულია სახლები და სამედიცინო და საგანმანათლებლო დაწესებულებები.