სომხეთის საგარეო საქმეთა სამინისტროს პრესმდივანმა, ანი ბადალიანმა აღნიშნა, რომ განცხადებაში გამოთქმულია მტკიცე პროტესტი რუსულ მედიაში სომხეთის მთავრობის წინააღმდეგ ღიად არამეგობრული, ხშირად მტრული პროპაგანდის მიმართ, რომელსაც აქტიურად ამყარებს ზოგიერთი თანამდებობის პირის, რუსეთის სახელმწიფო დუმის დეპუტატების, მედიისა და ექსპერტთა საზოგადოების წარმომადგენლების განცხადებები.

საპროტესტო ნოტაში ხაზგასმულია, რომ რუსეთის სახელმწიფო ტელევიზიის პირდაპირ ეთერში გაკეთებული შეურაცხმყოფელი განცხადებები, ასევე სომხეთის ხელისუფლების საქმიანობაზე თავდასხმები აბსოლუტურად მიუღებელია.

ამასთან, საპროტესტო ნოტაში ნათქვამია, რომ რუსეთის ფედერაციის სახელმწიფო დუმის ცალკეული დეპუტატების კომენტარები და განცხადებები სომხეთის რესპუბლიკის სამართალდამცავი ორგანოების მიერ სახელმწიფო გადატრიალების მცდელობის თავიდან ასაცილებლად განხორციელებულ სამართლებრივი ქმედებებთან დაკავშირებით არა მხოლოდ გაოცებას, არამედ აღშფოთებასაც იწვევს.

„ამგვარად, მსგავსი განცხადებები არათუ აბსურდულია, რადგან გაუგებარია, როგორ და რატომ ითვლება სახელმწიფო გადატრიალების თავიდან აცილება არამეგობრულ ნაბიჯად, არამედ წარმოადგენს სომხეთის საშინაო საქმეებში უხეშ ჩარევას. მეტიც, ისეთი შთაბეჭდილება იქმნება, რომ მსგავსი საინფორმაციო პოლიტიკა მიზანმიმართულად ტარდება სომხეთში დემოკრატიის, კანონიერებისა და კონსტიტუციური წყობის შელახვის მიზნით“, – აღნიშნეს სომხეთის საგარეო უწყებაში.