ავიაიერიშები მას შემდეგ განხორციელდა, რაც თურქეთის ხელისუფლებამ ანკარასთან მდებარე ავიაკოსმოსურ საწარმოზე თავდასხმაზე პასუხისმგებლობა „ქურთისტანის მუშათა პარტიას“ დააკისრა.

“ერაყსა და სირიაში საპასუხო იერიშის დროს, წარმატებით განადგურდა ტერორისტების კუთვნილი 32 სამიზნე”,- ნათქვამია თურქეთის თავდაცვის სამინისტროს განცხადებაში.

შეგახსენებთ, ერაყსა და სირიაში ავიაიერიშებამდე, ანკარაში თავდაცვით-სამრეწველო კომპანია Turkish Aerospace Industries-ზე, რომელიც აწარმოებს სამხედრო და სამოქალაქო თვითმფრინავებს, ვერტმფრენებს და დრონებს, ტერორისტული თავდასხმა მოხდა.

მედიაში გავრცელებული ბოლო მონაცემებით, დაიღუპა 5 და დაშავდა 22 ადამიანი. ლიკვიდირებულია ორი თავდამსხმელი.

მომხდართან დაკავშირებით ანკარის მთავარმა პროკურატურამ გამოძიება დაიწყო.