ბევრგან დემონსტრაციები პოლიციელებთან დაპირისპირებაში გადაიზარდა. პარიზსა და სხვა ქალაქებში დემონსტრანტების ნაწილმა პოლიციელებს დაუშინა ქვები, ბოთლები და პეტარდები. საპოლიციო ძალებმა ცრემლმდენი გაზი და ხელკეტები გამოიყენეს. საფრანგეთის შსს-ს ინფორმაციით, დაკავებულია 170-ზე მეტი ადამიანი, მათ შორის 72 პარიზში.

სააგენტო „ფრანს პრესის“ ცნობით, დემონსტრანტების აგრესიულად განწყობილმა ნაწილმა პარიზში, ბორდოში, ნანტსა და სხვა ქალაქებში ცეცხლი წაუკიდა ნაგვის ურნებს და ჩაამსხვრია მაღაზიების, ბანკების და სახელმწიფო დაწესებულებების ფანჯრები.

საფრანგეთის პრეზიდენტ ემანუელ მაკრონის საპენსიო რეფორმა ითვალისწინებს 2030 წლისთვის საპენსიო ასაკის ეტაპობრივად გაზრდას 62-დან 64 წლამდე. რეფორმის მოწინააღმდეგეები მეორე თვეა საპროტესტო აქციებს მართავენ.

კრიზისი კიდევ უფრო გამწვავდა მას შემდეგ, რაც გასულ კვირაში, საფრანგეთის მთავრობამ კონსტიტუციის შესაბამისი მუხლით ისარგებლა და გადაწყვეტილება პარლამენტის თანხმობის გარეშე დაამტკიცა. საფრანგეთის პარლამენტში დადგა მთავრობისთვის უნდობლობის გამოცხადების საკითხი, თუმცა, საკმარისი ხმები ვერ მოგროვდა.