CNN-ის ცნობით, რამდენიმე საათის შემდეგ ცნობილი გახდა, რომ 1 ადამიანია მოკლული და 7 დაჭრილი კალიფორნიის შტატის ქალაქ ოკლენდში. სხვა დეტალები ჯერჯერობით უცნობია.

22 იანვარს 11 ადამიანი მოკლეს კალიფორნიის შტატის ქალაქ მონტერეი-პარკში. ქალაქში, სადაც ბევრი აზიელი ემიგრანტი ცხოვრობს, მთვარის კალენდრით ახალი წლის დადგომას ზეიმობდნენ. ადგილობრივი პოლიციის ცნობით, მკვლელობის ადგილიდან გაქცეულ თავდამსხმელს მიაკვლიეს მეზობელ ქალაქ ალჰამბრაში და როცა მისი „პიკაპი“ ალყაში მოაქციეს, ეჭვმიტანილმა სასიკვდილო ჭრილობა მიიყენა. ის წარმოშობით აზიელი, 72 წლის ჰუ ცან ტრანი იყო.

ამერიკელების ნაწილი დიდი ხანია მოითხოვს ცეცხლსასროლი იარაღის გაყიდვის მაქსიმალურად შეზღუდვას. 2022 წელს, პრეზიდენტმა ჯო ბაიდენმა ხელი მოაწერა ცეცხლსასროლი იარაღის მიმოქცევაზე კონტროლის გამკაცრების კანონს, რომელიც ითვალისწინებს იარაღის შეძენის მსურველი, 18-21 წლის ასაკის პირების უფრო მკაცრად შემოწმებას. იარაღს ხუთი წლის განმავლობაში ვერ შეიძენს ოჯახური ძალადობისთვის სასჯელმოხდილი პირი. 15 მილიარდი დოლარი გამოიყო სასწავლო დაწესებულებების უსაფრთხოების დაცვის გაძლიერებისთვის და მოქალაქეთა ფსიქიკური ჯანმრთელობის საჭიროებებისთვის.