სტატიაში აღნიშნულია, რომ რუსეთის მიერ უკრაინის სასიცოცხლოდ მნიშვნელოვან ინფრასტრუქტურაზე განხორციელებული მასობრივი სარაკეტო დარტყმების შემდეგ, აშშ-ში უკვე ნაკლებად ინერვიულებენ, რომ კიევის თავდასხმებმა რუსეთის ტერიტორიის შიგნით შესაძლოა, კონფლიქტი გაამწვავოს. ამიტომ, უკრაინას აქვს უფლება, თავად გადაწყვიტოს, როგორ გამოიყენებს უკრაინის შეიარაღებული ძალებისთვის გადაცემულ იარაღს.

„ჩვენ არ ვეუბნებით უკრაინელებს, რომ არ მიიტანონ დარტყმები რუსებზე. ჩვენ მათ ვერ ვუკარნახებთ, რა უნდა გააკეთონ. ისინი თავად წყვეტენ, როგორ გამოიყენონ საკუთარი იარაღი. ერთადერთი, რასაც დაჟინებით მოვითხოვთ, რომ უკრაინელებმა ჩვენ მიერ გადაცემული შეიარაღების გამოყენებისას დაიცვან საერთაშორისო კანონები და ჟენევის კონვენციები“, – განუცხადეს „თაიმსს“ აშშ-ის თავდაცვის უწყებაში.

შეგახსენებთ, 5 დეკემბერს რუსეთის თავდაცვის სამინისტრომ გაავრცელა ცნობა, რომ სარატოვსა და რიაზანში მდებარე აეროდრომებზე დრონებით მიიტანეს იერიში, რის შედეგადაც სამი სამხედრო დაიღუპა. თავდასხმაში უკრაინას ადანაშაულებენ.

უკრაინა მომხდართან კავშირს ოფიციალურად არ ადასტურებს.