ზელენსკის სიტყვებს ამერიკელი კონგრესმენები და სენატორები ფეხზე წამოდგომითა და ტაშით შეხვდნენ. უკრაინის პრეზიდენტმა Zoom-ით ჩართვის დროს დიდ მონიტორზე გაუშვა რუსეთის საოკუპაციო ძალების მიერ ჩადენილი სამხედრო დანაშაულების ამსახველი ვიდეო.

„ბოროტება, რომელიც 24 თებერვალს დაიწყო, უნდა დასრულდეს და რუსეთი უნდა დაისაჯოს ამ აგრესიისთვის, ამ ტერორისთვის. ჩვენ ვხედავთ, რომ აქამდე მიღებული ზომები ვერ აჩერებს რუსეთის მკვლელ მანქანას. ჩვენ გვჭირდება ახალი ინსტიტუციები, ახალი ხელშეკრულებები, რათა დასრულდეს ეს ომი რაც შეიძლება სწრაფად. გთხოვთ, გადაარჩინოთ უკრაინა და გადაარჩინოთ ხალხი. თუ თქვენ შეაჩერებთ ამ ომს, ამით მილიონობით ადამიანს გადაარჩენთ არა მხოლოდ უკრაინაში, არამედ მსოფლიოში“, – განაცხადა ზელენსკიმ.

უკრაინის პრეზიდენტმა ასევე განმარტა, რომ უკრაინელ და ამერიკელ ხალხს საერთო ფასეულობათა სისტემა აქვთ, რაც თავისუფლების წყურვილს და სიყვარულს ეფუძნება. მისი თქმით, რუსეთს სწორედ ამ თავისუფლების წართმევა სურს.

„ვამაყობ, რომ მამაცი უკრაინელი ხალხის სახელით მოგმართავთ, იმ ხალხის, რომელიც რვა წელია, რუსეთის აგრესიას აკავებს და რომელიც არნახული სიმამაცით მესამე კვირაა ებრძვის რუსეთის ჯარს“, – განაცხადა უკრაინის პრეზიდენტმა.