სამეცნიერო კვლევებით უკვე დადგენილია, რომ კორონავირუსი სხვადსხვა საგნის ზედაპირებზე მოხვედრისას რამდენიმე საათიდან რამდენიმე დღემდე ცოცხლობს.

ამჯერად იმ ნივთების დასუფთავება-დეზინფიცირებაზე ვისაუბრებთ, რომლებთანაც ყოველდღიური კონტაქტი გვაქვს.

ყოველდღიურად უნდა გაიწმინდოს და დეზინფიცირდეს ისეთი საგნების ზედაპირები, რომელთაც ხშირად ვეხებით, ესენია: მაგიდა, კარის სახელურები, საკეტები, დენის ჩამრთველები, სამზარეულოს დახლ-მაგიდის ზედაპირები, ტელეფონები, კლავიატურა, უნიტაზი, ონკანის სახელური, ნიჟარა.

თუ საგნის ზედაპირი ჭუჭყიანია, გაწმინდეთ სადეზინფექციო ხსნარით ან საპნიანი წყლით.

ხსნარები დეზინფექციისთვის:

გამოიყენეთ საყოფაცხოვრებო სადეზინფექციო ხსნარები, რომლებიც მოწოდებული ზედაპირის დასამუშავებლად. მათი შეძენაშეგიძლიათ მარკეტებში.

ხსნარის თავად დასამზადებლად ასევე შეგიძლიათ გამოიყენოთ მათეთრებელი სითხე, ამისთვის: 1 ლიტრ წყალს უნდა შეურიოთ 1 სუფრის კოვზი მათეთრებელი.

აუცილებლად შეამოწმეთ სადეზინფექციო საშუალების და მათეთრებლის გამოყენების ვადა, რადგან ვადის გასვლის შემდეგ ისინი არაეფექტურია.

ასევე მნიშვნელოვანია ხსნარის კონცენტრაცია - თუ მათეთრებელს ნაკლები რაოდენობით აიღებთ, ხსნარი არაეფექტური იქნება.

ალკოჰოლის შემცველი ხსნარები:

სადეზინფექციოდ შეგიძლიათ გამოიყენოთ სპირტიანი ხსნარებიც.დარწმუნდით, რომ სპირტში ალკოჰოლის შემცველობა 70%-ზე მეტია. უმჯობესია გამოიყენოთ სამედიცინო სპირტი.

ეპიდემიოლოგები გვირჩევენ, რომ საყოფაცხოვრებო სადეზინფექციო ხსნარების გამოყენებისას ზუსტად დავიცვათ ის წესები, რაც მათ ინსტრუქციაშია მითითებული, კერძოდ, კონცენტრაცია ხსნარის მომზადებისას, ზედაპირზე დატანის მეთოდი, გაჩერების ხანგრძლივობა და ა.შ.