ღონისძიება ახალგაზრდა მკვლევართა ჯგუფის მიერ მომზადდა ქალაქ ქუთაისის მერიისა და საქართველოს იუსტიციის სამინისტროს ეროვნული არქივის მხარდაჭერით. ღონისძიებაზე წარმოდგენილი იქნება საუკუნის წინანდელ ქუთაისთან დაკავშირებული ვიზუალური თუ შინაარსობრივი მასალა, მათ შორისაა თბილისისა და ქუთაისის ცენტრალურ არქივში, ასევე საქართველოს პარლამენტის ეროვნულ ბიბლიოთეკაში, სხვადასხვა პირად არქივსა და ძველ ქართულ პრესაში დაცული მასალებიც. დამთვალიერებლის თვალწინ ქუთაისის ყოველდღიური ცხოვრების სურათები გაცოცხლდება, უნიკალური ფოტომასალა სხვადასხვა თემატიკას მოიცავს, ბანერებზე გამოსახული იქნება:

ქართველი მწერლების შეკრება ქუთაისში პოეზიის დღის აღსანიშნავად, ჯგუფურ ფოტოზე იმ პერიოდის ქართველ მწერალთა უმრავლესობაა თავმოყრილი - დავით კლდიაშვილი, შალვა დადიანი, ნიკო ლორთქიფანიძე, ვალერიან გაფრინდაშვილი, კოლაუ ნადირაძე და სხვები, ძველი ქუთაისის შენობა-ნაგებობები, ქუჩებისა და ხედების, საცხოვრებელი სახლების ფოტოები და პროექტები, სპორტული საზოგადოება ,,შევარდენი’’ ქუთაისში, მეზობელი სოფლებიდან რიონით შეშის შემოზიდვის პროცესი, ქუთაისელი ხელოსნები და ქუთაისელი სემინარიელები, საპატიო სტუმრები ქუთაისში
და ა.შ.

პრესის მასალაში გვხვდება სხვადასხვა ინფორმაცია იმ პერიოდის ქუთაისთან დაკავშირებით: მაგ.: თუ როგორ აღინიშნებოდა საქართველოს დამოუკიდებლობის დღე - 26 მაისი, ინფორმაცია იმის შესახებ, რომ ქუთაისელი მოსწავლეები გამოსცემენ სალიტერატურო ჟურნალს “წინსვლის ემბლემა’’; მელიტონ ბალანჩივაძე ხსნის სამუსიკო სკოლას ქუთაისში; ქუთაისელები ითხოვენ მუზეუმის გახსნას ტექსტით: ქუთაისი მისთვისაა გაჩენილი, რომ აქ იყოს მუზეუმი; ქუთაისში არსდება „თავისუფალი ესთეტიკის საზოგადოება” და ა.შ.

ღონისძიებაზე დასწრება თავისუფალია.