ქუთაისის მერის მოვალეობის შემსრულებელმა დავით ერემეიშვილმა, პარლამენტარმა ზაზა ლომინაძემ, ადგილობრივი ხელისუფლების წარმომადგენლებთან ერთად , ლილი ნუცუბიძის ქუჩაზე, ციფრული განათლებისა და შემოქმედებითი ინდუსტრიების ცენტრის რეაბილიტირებული შენობა მოინახულეს. შენობაში მოეწყო რამდენიმე სივრცე - მისაღები, საკონფერენეციო, სამუშაო, სამზარეულო ოთახები, შეიცვალა სახურავი, მოწესრიგდა ფასადი. შენობა ადაპტირებულია შშმ პირთათვის. პროექტის ღირებულებაა 1 036 962 ლარი.

მიმდინარეობს მდინარე ოღასკურას კალაპოტის რეკონსტრუქცია-რეაბილიტაციის მორიგი ეტაპი, დანიელ ჭონქაძის ქუჩისა და ავტომშენებლის გამზირის გასწვრივ მდებარე მონაკვეთზე. პროექტის მიხედვით გათვალისწინებულია ოღასკურას კალაპოტისა და მასზე არსებული ხიდ-ბოგირების რეაბილიტაცია. აღნიშნული სამუშაოებისათვის სტიქიის ფონდიდან 4 133 331 ლარია განსაზღვრული.

დაწყებულია მესხიშვილის ქუჩის საგზაო ინფრასტრუქტურის სარეაბილიტაციო სამუშაოები. ქუჩაზე მოეწყობა ასფალტბეტონის საფარი, ტროტუარი, სანიაღვრე ქსელი. მესხიშვილის ქუჩის რეაბილიტაციისთვის საქართველოს რეგიონებში განსახორციელებელი პროექტების ფონდიდან 948 654 ლარია გამოყოფილი.