იმისათვის, რომ ბრაზილიის მარეგულირებელმა ორგანომ ვაქცინა დაამტკიცოს მისი ეფექტურობა 50%-ს უნდა აჭარბებდეს.

ჩინური ვაქცინა ერთ-ერთია იმ ორიდან, რომელიც ბრაზილიის ხელისუფლებამ მოსახლეობას შესთავაზა.

კომპანია Sinovac-ის მიერ წარმოებული ვაქცინა CoronaVac მკვდარი ვირუსის მასალაზეა შექმნილი და აცრა ორგანიზმში სახიფათო რეაქციის რისკს არ  იწვევს. ვაქცინაზე მოთხოვნა უკვე გაკეთებული აქვს ინდონეზიას, თურქეთს, სინგაპურს.

კვლევების შედეგები ბრაზილიის ბუტანტანის ინსტიტუტმა გასულ კვირაშიც გამოაქვეყნა, სადაც ნათქვამი იყო, რომ ჩინური ვაქცინის ეფექტურობა 78%-ია, თუმცა რამდენიმე დღეში მათ ეს მონაცემი შეცვალეს, რადგან დასკვნაში ვირუსის მსუბუქი შემთხვევები გათვალისწინებული არ იყო. ყველა ფაქტორის გათვალისწინებით კი ვაქცინის ეფექტურობა 50.4 %-არ აღემატება.

თურქეთმა ჩატარებული კლინიკური კვლევების თანახმად განაცხადა, რომ ჩინური ვაქცინა 91.25%-ით ეფექტურია. ინდონეზიაში კი, სადაც მასობრივი ვაქცინაცია უკვე დაიწყო, აცხადებენ, რომ პრეპარატის ეფექტურობა მხოლოდ 65.3%-ია.

სპეციალისტები ვარაუდობენ, რომ Sinovac-ის ვაქცინის გამოცდა ჩინეთში ისეთ კონტროლს არ ექვემდებარება და შედეგებიც ისე გამჭვირვალე არ არის, როგორც  დასავლეთში წარმოებული ვაქცინები.

Sinovac-ისა და ოქსფორდისა და AstraZeneca-ს მიერ წარმოებული ვაქცინები ბრაზილიის მარეგულირებელ ორგანოში დამტკიცებას ელოდება.